Айдана Оторбаева, футболчу: “Калыс дагы, ийгилик дагы Германия курама командасы тарапта болду”

16-июндан 17-июнга караган түнү Бразилияда өтүп жаткан Дүйнө чемпиондугунун 1-тур оюндарынын алкагында “G” тайпасында Германия-Португалия беттеши орун алып, 4:0 эсебинде аяктады. Португалияга күйөрмандык кылган кыргызстандык таланттуу футболчу кыз Айдана Оторбаева SUPER.KG порталына маек куруп, калыстын каталарына жана германиялыктардын жогорку сапаттагы оюнуна токтолду.

“Германия оюнду толук бойдон көзөмөлдөп, мыкты ойной алды. Ошол эле учурда ар 2 мүнөт сайын германиялыктардын пайдасына ышкырган калыстын катасын эске алыш керек. Туура эмес пенальти берип, оюнга терс таасирин тийгизди. Андан тышкары, менин оюмча, Пепеге кызыл айып кагазын бербеши керек болчу жана 1-голдогудай кырдаалда Германиянын дарбазасына пенальти коюп бериш керек эле. Оюндун чыңалып, футболчулардын катуу ойноосуна да анын түздөн-түз тиешеси бар. Себеби футбол майданында калыстын иши оюнчуларды канааттандырбаса, орой оюн башталат. Катталган жаракаттар да ушундан улам болду. Эч нерсе эмес, Португалия тайпадан чыгууга мүмкүнчүлүгүн жогото элек, сапарын андан ары уланта берет”,- деди футболчу кыз.