Акыйкатчы институтуна 2013-жылы кыйноо фактысы менен 50дөн ашуун жаран кайрылган

Акыйкатчы институтуна 2013-жылы кыйноо фактылары боюнча 57 адам кайрылган. Ал эми жалпы республика боюнча укук коргоо органдарына 429 кайрылуу түшкөн. Бул тууралуу бүгүн, 16-июнда акыйкатчынын басма сөз кызматынан билдиришти.

Маалыматка ылайык, КРнын Акыйкатчысы Бакыт Аманбаев бүгүн, Борбордук Азиядагы Америка университетинин "Тянь-Шань" саясий борборунун жетекчиси, Австриядагы Людвиг Больцман адам укуктары боюнча институтунун изилдөөчүсү, изилдөөчү топтун жетекчиси Моритц Бирк менен жолугушту.

Жолугушуунун алкагында Б.Аманбаев 2014-жылдын апрель айында КРнын Акыйкатчысынын буйругу менен Кыйноо фактылары боюнча иликтөө жүргүзүүчү атайын комиссия борбордук аппаратта жана республиканын 7 облусундагы аймактык өкүлчүлүктөрдө иштеп жатканын маалымдады.

Аталган көз карандысыз комиссиялардын курамына КРнын Акыйкатчы аппаратынын кызматкерлеринен сырткары да белгилүү укук коргоочулар, врачтар тартылганы айтылды.