Англияда окуучу сагыз үчүн 7 мугалимин сабап салды

Англиянын Олдем шаарындагы мектептердин биринде окуучу сагыз үчүн 7 мугалимин сабап салды. Бул тууралуу бүгүн, 17-июнда чет элдик маалымат каражаттары жазып чыгышты. 

Маалыматка ылайык, мектептин фойесинде 14 жаштагы окуучу сагыз чайнап турган. Аны көргөн мугалим оозундагысын чыгарып, таштанды салынуучу чакага салуусун өтүнгөн. Бирок окуучу анын талабын аткаруудан баш тартып, каяша кайтарган. Ачуусу келген мугалим күч колдонуп сагызын алууга аракеттенип, жыйынтыгында экөөнүн ортосунда уруш чыккан. Аларды ажыратууга келген мугалимдерди окуучу отургучтар менен уруп кирген. Мындан кийин окутуучулар полиция кызматкерлерин чакырууга аргасыз болушкан.

Жыйынтыгында полиция кызматкерлери окуучуга мугалимдерине кол салгандыгы үчүн кылмыш ишин ачышты. Эми 20-июнда ал бала кылган жоругу үчүн сот алдында жооп бермекчи.