Экс-мэр Нариман Түлеевдин иши боюнча сот отуруму 15-июлга жылдырылды

Экс-мэр Нариман Түлеевдин иши боюнча сот отуруму 15-июлга жылдырылды. Бул тууралуу Жогорку Соттун басма сөз кызматы бүгүн, 26-июнда билдирди.

Кечээ, 25-июнда Бишкек шаардык сотунун жазык иштери жана административдик укук бузуулар жөнүндөгү иштер боюнча соттук коллегиясы Бишкек шаарынын экс-мэри Нариман Түлеевдин иши боюнча сот отурумун 15-июлга саат 10:00гө калтырды. Сот отурумунун жылышынын себеби соттолуучунун жактоочусунун алмашкандыгы жана анын жазык ишинин материалдары менен таанышууга убакыт сурагандыгына байланыштуу болгондугу айтылды. 

Эске салсак, 2013-жылы 29-июль күнү Бишкек шаарынын Ленин райондук соту Түлеевди мүлкүн конфискациялоо менен 11 жылга эркинен ажыраткан. Ал коррупциялык иштер боюнча айыпталган. Аны менен кошо иштеген айыпталуучулар да 5 жылдан 13 жылга чейин эркинен ажыратылган.