Кытай бийлиги 2 жаштагы аракеч баланын тагдырына кийлигишүүнү чечти

Кытайдагы Аньхой провинциясындагы жергиликтүү бийлик 2 жаштагы аракеч баланын тагдырына кийлигишүүнү чечти. Бул тууралуу 25-июнда чет элдик басылмалар жазып чыгышты.

Маалым болгондой, 2 жаштагы Чэн Чэн аттуу баланын ата-энеси баласын кичинекей кезинде алкоголь ичимдигине көндүрүп коюшкан. Жергиликтүү ММКларда талкууга алынган кырдаалды иликтөө үчүн медициналык жана социалдык кызматкерлерге тийиштүү тапшырма берилди.

Чэн Чэн 10 айлык кезинде ыйлай бергендиктен, атасы баласына шарап ичирип көргөн. Баланын ыйы токтоп калганын көргөн ата-энеси ага алкоголь берип турушкан.  

2 жаштагы бала учурда бир бөтөлкө сыраны бир канча мүнөттө түгөтүп коё алат. Ата-энеси ичимдикти сүт жана шире менен алмаштырууга аракет кылышкан, бирок натыйжа болгон эмес. Баланын туугандары ыйлаганын токтото албай ичимдик берүүгө туура келгенин айтып чыгышкан. Андан спирт ичимдиктерин катып койгону менен, конок келгенде таап ичип алып турганын билдиришкен. 

Бул көйгөйгө бийлик өкүлдөрү кийлигишкенден кийин туугандары балага алкоголь бербей койгондугун айтышкан. Медициналык кызматкерлер "баланын ички органдарына зыян келиши мүмкүн" деген пикирди айтышканы менен, текшерүүнүн жыйынтыгын жарыялаша элек.