Бразилиядагы Дүйнө чемпиондугу: Тайпалык баскычта утуп чыккан 16 команда

Бразилия. "А" тайпасынан биринчи болуп чыкты. Кийинки атаандашы Чили болот.

Мексика. "А" тайпасынан 2-орунду ээлеп чыкты. Голландия менен беттешет.

Голландия. "Учуучу голландиялыктар" деп бекеринен айтылбаса керек. Бул жолу да Голландия көпчүлүктү таң калтырууда.

Чили. Испанияны уткан Чили эми Бразилияга татыктуу атаандаш болуп берерине ишенгендер көп.

Колумбия. Ар бир гол кирген сайын Шакиранын жердештери болгон футболчулар бийлеп жатышат. Ал эми алардын бийин алдыда көрүүнү каалагандар аз эмес.

Греция. Бул командага эч ким так аныктама бере албайт, чынында. Тайпадан чыгарына үмүт артпагандар оозун жабууга аргасыз болушту.

Коста-Рика. Италия менен Англия үйүнө айдаган команда эми Греция менен тирешет.

Уругвай. Чуу коштогон команда десек болот. Кийинки атаандашы Колумбия менен болгон оюнда дареметин көрөбүз.

Франция. Зидан сыяктуу лидер жок болсо да, Франция бул мелдештин мыкты командаларынын катарын толуктайт.

Швейцария. Анык европалык футболдун үлгүсүн көргөзгөн футболчулар.

Аргентина. Бул команданы каймана түрдө Месси деп да атаса болот. Анткени команданын дээрлик бардык голдорун ушул футболчу киргизүүдө.

Нигерия. Африканын намысын коргоого жарай турган 2 команданын бири.

Германия. Мелдеште жарым коргоочулардын саны жана сапаты боюнча алдына ат салдырбаган команда.

АКШ. Бул курам Германияга каршы татыктуу оюн көрсөттү.

Бельгия. Жаш футболчулардан турган бул курамдын ийгилигине ишеним арткандар көп.

Алжир. Орусияны плей-оффтук жолдомодон куру калтырган африкалык команда.

Бул жолку футбол боюнча Дүйнө чемпиондугу көп кызыктарга бай болууда. Ири эсептер, күтүлбөгөн жыйынтыктар жана европалык футбол державаларынын мелдештен "учуп кетиши" анын өзгөчөлүгүнөн кабар берсе керек. Кыскасы, "футбол карнавалы" деген тамашалуу аталышты алып жүргөн биринчилик күйөрмандардын толук купулуна толуп жатат.

27-июнга караган түнү болгон оюндардын жыйынтыгында тайпалык баскыч жыйынтыкталып, мелдештин кийинки баскычына чыккан (1/8 финал) 16 команда белгилүү болду. Ушул баскычтан баштап мелдеш чоң “согуш майданына” айланат. Анткени утулган ар бир команда мелдештен “ыргып” кетет. Ошондой эле 1/8 финалдан тартып футболчулардын киргизген голдору кымбатка бааланып, командалар анык жеңиштин даамын же жеңилүү ызасын татышат.

Бул тепкичтеги утулуу коркунучун эске алып, көптөгөн күйөрмандар атаандаш командага сүр көрсөтүү максатында “Тозокко кош келдиңиз!” деген чакырыкты колдоно башташат. Биз 16 команданы тайпадагы жеңиштери менен куттуктап, марада күлүктү тосуп чыккан саяпкердей кубанычтуу тосуп алмакчыбыз...

Мелдеш жадыбалы менен таанышып алыңыз