Орусиянын спорт министри команданын тайпадан чыкпай калганын жоготуу деп эсептебейт

Орусиянын спорт министри Виталий Мутко команданын тайпадан чыкпай, мелдештен четтеп калганын жоготуу деп эсептебейт. Бул тууралуу бүгүн, 27-июнда чет элдик маалымат булактары кабарлады.

"Команда ойнобой койду" деген сындарды айтпаш керек. Ооба, ката кетирдик, жыйынтыгы жаман болду. Орусия 12 жылдан бери Дүйнө чемпиондугунда ойногон эмес. Өз деңгээлибизди көрдүк, тажрыйба алдык. Алжирдин бир топ оюнчулары Европанын алдынкы клубдарында ойношот. Бизде андай оюнчулар жок",- деп билдирген Мутко.

Кошумчалай кетсек, Орусиянын мелдештен четтеп калганы учурда көп талкуу жаратууда. Спорт министринин мындай ойлонгону кызмат ордунан айдалып кетиши мүмкүн болгон башкы машыктыруучу Фабио Капеллого жакса керек. Ал Орусия курамасы менен мындан ары иштешүүгө даяр экенин билдирди.