Бүгүн Карганбек Самаков Япония парламентинин Өкүлчүлүк палатасынын мүчөсү менен жолугушту

Иш сапары менен бир нече күндөн бери Кыргызстанда жүргөн Й.Харада мурда да Кыргызстанда болгонун, бирок бул жолу Кыргызстан менен кеңирирээк таанышууга мүмкүнчүлүк алганын айтып, эки өлкөнүн парламенттеринин ортосундагы кызматташтыкты мындан ары дагы чыңдоо, экономикалык байланыштарды бекемдөө боюнча ойлорун ортого салды. 

Өз кезегинде депутат Карганбек Самаков парламенттер аралык кызматташуунун натыйжасында уюштурууга жетишилген «Кыргызстан-Кагошима» уюму, эки парламенттин ортосундагы депутаттык достук топтору, медициналык жабдууларды алып келүү, маданий байланыштарды бекемдөө боюнча аткарылып келген иштер туурасында маалымат берди. Ошону менен бирге эле Й.Харада баштап демилгечи болуп келип отурган энергияны үнөмдөөчү жабдууларды ишке киргизүү багытындагы аракеттер колдоого арзый турганын айтып өттү. 

Депутат Эсенгул Исаков да сөз алып, Япониянын гранттык жардамдарына таянып айыл чарбасында аткарыла турган иштердин арбын экендигин айтуу менен бул багыттагы кызматташууну дагы да жандандыруунун зарыл болуп жатканын белгиледи. Бул тууралуу ЖКнын басма сөз кызматы билдирди.