Бразилиядагы Дүйнө чемпиондугу: Франция атаандашы Нигерияны акыркы мүнөттөрдө утуп кетти

Бүгүн, июнь айынын акыркы түнүндө жарым чейрек финалдык оюндардын алкагында Франция курама командасы Нигерия менен кез келди. Оюндун алгачкы бөлүгүндө эки команда тең кооптуу кырдаалдарды түзө алышты. Бирок гол жаратуу ишке аша берген жок. Франция курамасы топту көбүрөөк көзөмөлгө алды. Атаандаштары катага жол берип жатканына карабай француздардын бир катар чабуулдары ийгиликсиз аяктап жатты. Катардагы оюндардай пенальтилер сериясы тууралуу ойлор кете баштаган маалда француздар оюн эсебин ачышты. Матье Вальбуэнанын бурчтан чыгарып берген тобун дарбазачы чала тосуп калды. Кымкуттуктан пайдаланган Погба ачык калган дарбазага топту башы менен таамай багыттады. Экинчи гол да бурчтан чыгарууда жаратылды. Ошол эле Вальбуэнанын жакын аралыкка кирип, ортого тоголоткон тобун коргоочу менен дарбазачы бири-бирин түшүнбөй дарбазага багыттап алышты. Албетте, бул жерде Антуан Гризманндын аларга кылган басымы да өз таасирин тийгизди.

ФРАНЦИЯ - НИГЕРИЯ – 2:0

Голдор: Погба (79-мүнөттө), Йобо (90-мүнөттө, өз дарбазасына).