Айчүрөк Иманалиева Ялтада өтчү "Чыгыш базары" Эл аралык фестивалында калыстар тобунун мүчөсү болот

22-28-августта Ялта шаарында өткөрүлчү “Чыгыш базары” 9-эл аралык фестивалында КРнын Эмгек сиңирген артисти Айчүрөк Иманалиева калыстар тобунун мүчөсү болот. Бул тууралуу ырчы бүгүн, 1-июлда SUPER.KG порталына билдирди.

Ал эми бул эл аралык сынакка өлкөнүн намысын коргоо үчүн ырчы Курал Чокоев аттанат. 

“Мен эл аралык сынактарда 5-ирет калыс болгону жатам. Башкы максатыбыз - Кыргызстандын намысын коргоп, байгелүү 3 орундун бирөөсүн камсыздап кайтуу. Биздин 2 же 3 катышуучуну сынакка алып барууга укугубуз бар. Андыктан тажрыйбасы көп деп Курал Чокоевди тандадык. Өлкөнү татыктуу көрсөтүп кайтуу үчүн мыктынын мыктысы барыш керек. 

Сынакка “Музаман” тобу же ырчы кыздардын бири барып калышы мүмкүн. Айта кетсем, эл аралык сынактарда өзүңдүн кишиң калыстар тобунда отурса, катышуучуга чоң стимул болот. Бир жакадан баш, бир жеңден кол чыгарып, жапа тырмак биргелешип иш алып барасың. Өзүңдүн катышуучуңа жактоочу болуп, таламын талашасың. Башка калыстар тобунун мүчөлөрүнө ишеничтүү түрдө жан тарткан катышуучуга көрсөтүп турсаң, алар да талантына татыктуу баа беришет”,- дейт Айчүрөк Иманалиева.