Оштун борбордук базарында 194 жеке объект бар

Ош шаардык мэриясынын буйругуна ылайык, борбордук базарда жеке объектилердин чеги белгиленүүдө. Бул тууралуу бүгүн, 3-июлда мэриянын басма сөз кызматы билдирди.

Маалыматка ылайык, шаар тургундарынын арызынын негизинде жана Ош шаардык мэриясынын 10-июнунда кабыл алган токтомун ишке ашыруу максатында биринчи вице-мэр Замир Аскаров жетектеген комиссия тарабынан шаардын борбордук базарындагы жеке кичи базарлардын чегин аныктоо иши башталган.

Борбордук базарда аталган иш жарандардын бул маселе боюнча жеке кайрылууларынан улам башталганын айтат Замир Аскаров.

Комиссиянын ишинин жыйынтыгында 2-июлда мамлекеттик акт боюнча 16 объект аныкталды.

Ош шаардык өндүрүш жана жеке ишкерликти өнүктүрүү башкармалыгынын жетекчиси Алик Мурзалиевдин билдирүүсүндө жалпысынан борбордук базарда 194 жеке объект бар. Алардын ичинен 86сы жерди колдонуу боюнча мамлекеттик актыга ээ. Ал эми 108инде техпаспорт, соттун чечими жана мэриянын токтому гана бар.