Дүйнө чемпиондугундагы Бразилиянын утулушунан кийин күйөрмандары бир канча автобусту өрттөп салышты

8-июлдан 9-июлга караган түнү Бразилиядагы Дүйнө чемпиондугунун жарым финалында Германия курамасы менен Бразилия кез келип, оюн Германиянын пайдасына 1:7 эсебинде аяктаган. Бразилиядагы Сан-Паулу шаарында өлкө курамасынын утулушунан кийин күйөрмандары бир канча автобусту жана жеңил унааларды өрттөп салышты. Бул тууралуу жергиликтүү телеканалдарга шилтеме берүү менен чет элдик басылмалар жазып чыгышты. 

Жергиликтүү полициянын маалыматына караганда, оюн бүткөндөн кийин белгисиз адамдар тарабынан кеминде 6 автобус өрттөлгөн. Ошондой эле дүкөндөрдөн уурулук фактысы да катталган. Бул баш аламандыкка шектелген бир нече жаран колго түшүрүлгөн. 

Сан-Паулу жана Ресифи шаарындагы баш аламандыкты күйөрмандар Бразилия курамасы дарбазасына 5-голду өткөрүп жиберишкенде эле башташканы айтылууда.