Назира Токонова жана Элмирбек Иманалиев Казакстандын президентинин туулган күнүндө ырдашты

Кыргыз эстрада ырчысы Назира Токонова жана төкмө акын Элмирбек Иманалиев Казакстандын президенти Нурсултан Назарбаевдин туулган күнүнө карата Алматы шаарында уюштурулган иш-чарага катышып, ырдап кайтышты. Бул тууралуу бүгүн, 9-июлда Назира Токонова SUPER.KG порталына билдирди.

Белгилүү болгондой, иш-чара президенттин резиденциясында өткөрүлүп, Элмирбек Иманалиев комузу менен ырдап саламдашса, Назира Токонова кыргыздын элдик ырларын аткарган. Ошондой эле бул фестивалга орусиялык белгилүү ырчылар Григорий Лепс, Михаил Боярский жана башкалар катышкан.  

“2 күнгө созулган концерт мыкты деңгээлде өткөрүлдү. Бизди абдан жакшы кабыл алышты. Бардык ырчылар туруп алып ырдашыптыр, мени болсо президент өзү “чарчап каласың” деп, отургузуп ырдатты. Алар биздин “Жылкычынын ыры” чыгармасын жакшы көрүшөт экен, ошол ырды сурап жатышты”,- дейт Назира Токонова.