"Батукаевди Келдибековдой кайтарышса, ал качып кетмек эмес" дейт "Ата Журт” партиясынын басма сөз кызматынын жетекчиси

Бүгүн, 10-июлда депутат Ахматбек Келдибековго байланышкан соттук отурум 15-июлга жылдырылганына байланыштуу “Ата Журт” партиясынын басма сөз кызматынын жетекчиси Нургазы Анаркулов SUPER.KG порталына төмөндөгүдөй ой бөлүштү: “Жактоочунун айтымында, Ахматбек Келдибеков бүгүн ден соолугуна байланыштуу келе алган жок. Мен фракциянын басма сөз кызматынын жетекчиси катары Ахмат мырза менен жолугууга аябай аракет кылдым. Бирок аны катуу кайтарууга алып жатышат. Эгер Батукаев ушундай кайтарууга алынса, менимче, ал качып кете алмак эмес. Тергөө иштеринде Ахматбек Келдибековго тагылып жаткан айыптар далилденген жок”.

Ал эми “Ата Журт” фракциясынын депутаты Курманбек Осмонов болбой калган соттук отурум боюнча: “Соттук отурум Ахматбек Келдибековдун келбей калгандыгына байланыштуу жылдырылды. Бирок судья соттук отурумдун маани-маңызына тиешелүү болбогон процессуалдык маселелерди карай берсе болмок, себеби карала турган көп документтер бар болчу”,- деген оюн билдирди.

Биринчи Май райондук сотунун судьясы Абдразак Боромбаев бүгүн, 10-июлда Ахматбек Келдибековго байланышкан соттук отурумду 15-июлга калтырды. 

Эске салсак, Ахматбек Келдибековго “кылмышка шериктеш болуу”, “коррупция” жана “кызмат абалынан кыянаттык менен пайдалануу” беренелери боюнча айып тагылууда.