Бишкек-Ош унаа жолунда жол кырсыгынан автоунаа күйүп, эки адам каза болуп, бир адам жабыркады

Бүгүн, 10-июль күнү эртең мененки саат 06:15те Бишкек-Ош унаа жолунда катталган жол кырсыгында автоунаа күйүп, эки адам көз жумду. Дагы бир адам жабыр тарткан. Бул тууралуу бүгүн, 10-июлда ӨКМнын басма сөз кызматы кабарлады.

Маалыматка ылайык, кырсык Ош облусундагы Өзгөн районунун Кароол айыл өкмөтүндөгү Мырза-Арык айылында, Бишкек-Ош унаа жолунун 618-619-чакырымында катталган. Анда Ауди С4 үлгүсүндөгү унаа (мамлекеттик номуру O 7638 G) катуу ылдамдыкта баратып жолдон чыгып, даракка урунган. Кырсыктын кесепетинен автоунаадан өрт чыгып, айдоочу, Кара-Кулжа районуна караштуу Ак-Кыя айылынын тургуну, 1987-жылы туулган А.Жуманов жана Кара-Кулжа районуна караштуу Ак-Кыя айылынын тургуну, 1987-жылы туулган Ш.Калмурзаев ошол жерде каза болгон. Андан тышкары унаада келаткан дагы бир жаран жаракат алып, Куршаб айылдык ооруканасына жеткирилген.