Орусияда катуу шамалдан улам кулаган дарак эгиз кыздардын өмүрүн алганы айтылды

Өткөн аптанын соңунда Орусиянын Новосибирск аймагында аба ырайы кескин өзгөрүп, абанын температурасы +40°Cден +20°Cге чейин түшүп кеткен. Натыйжада шаарда мөндүр жаап, шаардык көлдө эс алып жаткандар, сууда сүзүп жүргөндөр мөндүрдөн жашынууга аракет кылышкан. Ал жерде жаракат алгандар тууралуу маалымат жок. 

Жаратылыш кубулушу башка аймактарда адам өмүрүн алган учурлар менен коштолгон. Новосибирск облусундагы катуу шамалдан кулаган дарак бир айымдын өмүрүн алган. Ошондой эле эс алуучулардын чатырына дарак кулап, 3 жаштагы эгиз кыздардын өмүрүн алганы айтылды. Чатырдын ичиндеги үчүнчү кыз ооруканага жеткирилген. Окуя Обск суу сактагычынын жанындагы "Чайка" эс алуучу жайында орун алган. Кыздардын өлүмү боюнча кылмыш иши козголду. 

Новосибирск облусунда жаратылыш кырсыгынан улам жүздөгөн турак үйлөр жарыксыз калса, бир нече унаа жараксыз абалга келген. Аймактын жетекчилиги жаратылыш кубулушунун кесепеттерин жоюу багытында аракеттерди көрүүдө. Бул тууралуу 14-июлда орусиялык басылмалар жазып чыгышты.