Ысык-Көл. "Иним чагылгандан эмес, РЭСтин айынан токко тартылып мерт болду" дейт маркумдун эжеси

Ысык-Көл облусуна караштуу Тоң районундагы Кажы-Сай айылына 8-июлда чагылган түшүп, райондук электр тармактарынын кызматкери, 40 жаштагы Ишен Күсөгөнов темир түркүктө оңдоо иштерин жүргүзүп жаткан учурда чагылган түшүп каза тапкандыгы айтылган эле. 

Ал эми бүгүн, 14-июлда маркумдун бир тууган эжеси Бактыгүл Тазабекова SUPER.KG порталына өзү байланышып, акыйкат издеп жаткандыгы тууралуу кабарлады. 

Анын айтымында, 8-июль күнү окуя таптакыр башкача болгон. “Ошол күнү иним Ишен Күсөгөнов зым карагайдын башында иштеп жатканы чындык. Бирок ал окуя болгон күнү жамгыр саат 15:30 чамасында башталган. Ал эми каргашалуу окуя саат 14:30 чамасында болуптур. Иним зым карагайдын башында кызмат аткарып жатканда РЭСтин борбордук бөлүгүнөн токту коё берип жиберишиптир. 

Натыйжада иним токко тартылып каза тапкан. Эртеси Караколдон адистер келип, экспертизадан өткөрүшүп, “токко тартылып өлгөн” деген жыйынтык чыгарып беришти. Бирок ӨКМ ал маалыматты жокко чыгарып, ошол эле күнү бардык маалымат булактарына “чагылган тийип каза тапты” деген маалыматты таратып жиберген экен. 

Мындай окуя көп эле болот. Шалаакылыктын айынан аталган РЭСте иштеген канчалаган балдар мунжу болуп калышты”,- деди Бактыгүл Тазабекова.