Орусия. Метродогу кырсыктан көз жумгандардын саны 20га жетти, жабыркагандардын же каза болгондордун арасында кыргызстандыктар жок

Бүгүн, 15-июлда эртең менен "Славян бульвары" станциясынан 200 метр алыстыкта поезд тез токтоп, 3 вагон рельстен чыгып кетти. Мындан улам Москва шаарынын жетекчилиги эртең, 16-июлду аза күтүү күнү деп жарыялап, метрону кайра ишке киргизүүгө 2 күндөй убакыт кетерин айтты.

Орусиянын өкмөт башчысы Дмитрий Медведев каза болгондордун жакындарына өкмөттүн атынан көңүл айтып, кырсыктын кесепеттерин жоюу үчүн бүт аракеттер жумшаларын кошумчалады.

КРнын Тышкы иштер министрлиги "Орусиянын Өзгөчө кырдаалдар министрлиги тарабынан кырсыктан жаракат алгандардын өздүгү такталууда. Алдын ала маалыматтарга караганда, жабыркагандардын же каза болгондордун арасында чет өлкөлүктөр, анын ичинде кыргызстандыктар жок" деп билдирди.

Өзгөчө кырдаалдар боюнча шаардык комиссиянын жетекчиси жана мэрдин орун басары Пётр Бирюков кырсыктан көз жумгандардын саны 20га жеткенин маалымдады. Бир нече мүнөт мурун көз жумгандардын саны 15ке жеткени айтылган болчу.

Саламаттыкты сактоо департаментинин жетекчилигине шилтеме берүү менен орусиялык басылмалар 11 адамдын мерт болгонун жана 120дан ашуун жаран жаракат алганын жазып чыгышкан эле. Маалыматка караганда, алардын 106сы бейтапканаларга жайгаштырылды. Жаракат алгандардын басымдуу бөлүгүнүн абалы оор. 

Кырсыкка кабылган поездден 200дөй жүргүнчү эвакуацияланган. Окуя болгон жерге барган Москва шаарынын мэри Сергей Собянин курман болгондордун жакындарына 1 миллион рублден, ал эми жаракат алгандарга 500 миң рублден компенсация төлөнөрүн билдирди. 

Буга чейин жогорудагы кырсыктан 3 адам каза болгону жана 80ге жакын жаран жаракат алганы айтылган эле.