Кипрде жумуш берүүчүлөргө алданып, күч колдонуу менен сойкулукка тартылган кыргызстандык айым мекенине кайтарылды

Кипрде жумуш берүүчүлөргө алданып, күч колдонуу менен сойкулукка тартылган кыргызстандык айым мекенине кайтарылды. Бул тууралуу бүгүн, 16-июлда “Замандаш” ассоциациясынан билдиришти.

Маалыматтарга караганда, Н.К. аттуу айым интернет аркылуу Кипрдеги Кирения шаарындагы «Tuty fruty» деп аталган түнкү клубга бийчи болуп орношкон. Кийин жумуш берүүчү тарап бардык жол акыларын төлөп, Н.К. Кипрге барган. Арадан 3 күн өткөндө жумуш берүүчүлөр кыргызстандык айымга интимдик кызмат көрсөтүп иштеши керектигин, эгер макул болбосо, өмүрүнө зыян келтире тургандыктарын билдиришкен. 

Н.К. аргасыздан 3 жума бою жумуш берүүчүлөр айткан талаптарды аткарып турган. Кийин ал түнкү клубга келген кардар аркылуу КРнын Кипрдеги Башкы консулдугунун телефонун алдырып, башкы консул Руслан Молдокулов менен байланышка чыгып, окуянын чоо-жайын түшүндүргөн. 

Жергиликтүү полиция жана “Замандаш” ассоциациясынын, Стамбулдагы Башкы консулдуктун кызматкерлери менен биргеликте жүргүзүлгөн иш-аракеттердин натыйжасында кыргызстандык Н.К. аны кармап турган адамдардын колунан бошотулуп, мекенине жөнөтүлгөн.