“Кыргызстан аба жолдору” компаниясынын тонолгонуна кыргызстандык жаран шектелүүдө

Орусиянын борбору Москва шаарында “Кыргызстан аба жолдору” компаниясынын бөлүмүнүн тонолгонуна кыргызстандык жаран шектелүүдө. Бул тууралуу бүгүн, 18-июлда милицияга шилтеме берүү менен орусиялык басылмалар жазып чыгышты.

Маалыматтарга ылайык, ал компаниянын бөлүмүнө кирип, тапанча менен күзөтчү тарапка ок чыгарган. Андан соң компаниянын кызматкерин коркутуп, болжол менен 200 миң рубль уурдаган. Окуядан улам көкүрөк клеткасынан жаракат алган 22 жаштагы күзөтчү ооруканага жаткырылган.

Учурда кылмышка шектүү изделүүдө. Ал Кыргызстандын жараны экени айтылууда. Компаниянын кызматкерлеринин билдиришинче, акыркы апталарда аны бөлүмдүн жанында бир топ жолу байкашкан.

Эскерте кетсек, 16-июлда Москванын Коровий Вал көчөсүндөгү жер астындагы өтмөктө жайгашкан “Кыргызстан аба жолдору” компаниясынын бөлүмү тонолгон.