Алмазбек Атамбаев тышкы иштер министри Эрлан Абдылдаев менен эл аралык мамилелерди талкуулады

Бүгүн, 19-июлда президент Алмазбек Атамбаев тышкы иштер министри Эрлан Абдылдаевди кабыл алды. Жолугушууда мамлекет башчыга тышкы иштер министрлеринин V кеңешмесинин “Борбордук Азия + Япония” диалогунун жыйынтыгы тууралуу маалымат берилди. Эрлан Абдылдаев Кыргызстан, Япония, Казакстан, Тажикстан, Өзбекстан жана Түркмөнстандын тышкы иштер министрлери менен өткөрүлгөн  сүйлөшүүлөрдө, эки тараптуу жана көп тараптуу форматта кызматташуунун абалы жана келечеги боюнча мазмундуу пикир алмашуу болгонун айтып берди. Министр жолугушууда кыргыз тарап өлкөлөр ортосундагы маселелерди конструктивдүү жол менен гана чечүү зарылчылыгын баса белгилегенин кабарлады.

Алмазбек Атамбаев менен министр Эрлан Абдылдаев регионалдык жана эл аралык актуалдуу маселелерди да талкуулашты. Мамлекет башчы өлкөнүн тышкы саясат боюнча күч-аракети эл аралык өнөктөштөр менен кызматташууну активдештирүүгө, ал эми келип чыккан маселелер Кыргызстандын улуттук кызыкчылыктарын эске алуу менен чечилүүгө тийиш экендигин белгиледи.