Сокулукта жүк ташуучу унаа 200 түк чөп менен кошо күйүп кетип, айдоочу ооруканага жеткирилди

Жарандык коргонуунун Өрткө каршы күрөшүү кызматынын маалыматы боюнча, республиканын аймагында 23 өрт кырсыгы катталып, аларды өчүрүүгө 25 өрт өчүрүү бөлүмү тартылган. Бул тууралуу 21-июлда ӨКМнын басма сөз кызматы билдирди.

Бишкек шаарындагы Ботаникалык бакчада тамеки чегүүдөгү этиятсыздыктан улам 700 чарчы метр куураган чөп күйгөн. 

Ал эми Чүйдүн Сокулук районуна караштуу Новопавловка айылында ГАЗ-53 жүк ташуучу унаа 200 түк чөп менен кошо күйүп кеткен. Айдоочусу бетинен, колунан күйүк алып, өрт өчүрүүчүлөр жеткенче Сокулук районунун ооруканасына жеткирилген (аты-жөнү такталууда).

Мындан сырткары Ош облусунун Ноокат районуна караштуу Ынтымак айыл өкмөтүндө шифер жабылган 2 кабаттуу сарайдын 240 чарчы метр чатыры, 4 тонна чөп, 1 куб жыгач, 2 тонна тезек күйгөн. Өрттүн келип чыгуу себеби такталууда.