Жарандар “Ош базарынын” жанында бир кызды күч менен унаага салып алып кеткен окуяга күбө болушту

Кечээ, 20-июлда Бишкекте “Ош базарынын” аймагында аял жана бир нече жигит жаш кызды унаага күч менен салып алып кетишти. Бул тууралуу интернеттеги социалдык тармактар аркылуу окуяга күбө болгон Дарья Геттуева жарыялады.

Анын айтымында, кыз “мен кош бойлуумун, окугум келет” деп кыйкырып, жардам сураган. “Бирок буга карабастан, аял "бул менин кызым" деп аны унаага күч менен сала берген. Ага бир нече жигит көмөк көрсөтүшкөн. Жигитим экөөбүз гана муну токтотууга аракет кылдык. Ал эми башкалар жардам берген жок",- дейт Д.Геттуева.

Бул тууралуу SUPER.KG порталына КРнын Ички иштер министрлигинин басма сөз катчысы Эрнис Осмонбаев окуя үй-бүлөлүк пикир келишпестиктин негизинде болушу мүмкүн экенин айтты. "22 жаштагы кыздын күйөөсү жана бир баласы бар экен. Аны алып кеткен аял анын энеси экени тастыкталды. Мындан тышкары энеси ага унааны белек кылганы белгилүү болду. Кыздын билдиришинче, окуядан улам анын баштыгы жоголду. Ал эми кызды алып кетүү кандай себептен, кандай максат менен болгонун тергөөчү териштирет",- деди Осмонбаев.