Өкмөт: “Жантөрө Сатыбалдиев менен иштешкен чиновниктер кызматтарынан алынат”

КРнын мурунку Премьер-министри Жантөрө Сатыбалдиев жетектеген Ош, Жалал-Абад шаарларын калыбына келтирүү дирекциясында жооптуу кызматтарды ээлеген 12 чиновник кызматтарынан бошотулат. Бул тууралуу бүгүн, 23-июлда маалымат жыйынында КРнын Премьер-министри Жоомарт Оторбаев билдирди.

Анын айтымында, Жогорку Кеңештеги көпчүлүк коалициянын курамына кирген “Ата Мекен”, КСДП, “Ар-намыс” фракцияларынын лидерлери андан 2010-жылы Ош жана Жалал-Абадды калыбына келтирүү боюнча түзүлгөн мамлекеттик дирекциясынын мурдагы жетекчилерин кызматтан алууну суранышкан. “Эсеп палатасында бул тууралуу тиешелүү документтер бар”,- деди өкмөт башчысы.

Айта кетсек, кызматтан алууга талап кылынган 12 чиновниктин катарында өкмөттүн Жалал-Абад облусундагы ыйгарымдуу өкүлү Жусупжан Жээнбеков, өкмөттүк аппараттын жетекчисинин орун басары Каданбай Бактыгулов жана Каржы министрлигинин Баалуу металлдар департаментинин башчысы Молдобазар Эркебаевдер бар.