“1991-жылы Кыргызстанда 30 мечит болсо, бүгүнкү күнү 1700гө чейин көбөйүп кетти” дейт адис Владимир Школьный

“Кыргызстан 1991-жылы көз карандысыздыгын алганда 30 мечит жана 20 чиркөө болсо, бүгүнкү күнү 1700 мечит жана 300 чиркөө бар”,- деди бүгүн, 24-июлда маалымат жыйынында дүйнөлүк дин боюнча адис Владимир Школьный.

Анын айтымында, диний мекемелер чет өлкөлөрдөн келген акча каражатына курулган. “Мындан тышкары чет өлкөлөрдө билим алган дин ишмерлери кыргызстандыктарды окутуп жатышат. Алардын арасында радикалдык жана экстремисттик күчтөр бар. Мындай көйгөй Кыргызстандын түштүк аймагында өтө курч болууда”,- деди адис.

Мындан тышкары ал үстүбүздөгү жылдын февраль айында түштүктө 1984-1991-жылкы жигиттер кармалганын баса белгиледи. “Алардын өлкөбүздө террорчулук иш-аракеттерди өткөрүүнү пландаганы аныкталган. Кошумчалай кетсем, учурда Сирияда жана Египетте согушка катышып жүргөн мекендештерибиз бар экени белгилүү. Мунун баары диндин терс жагы”,- деп билдирди В.Школьный.