Кыргызстанда диний-экстремисттик күчтөргө каршы басылма чыгарылды

Бүгүн, 24-июлда маалымат жыйынында дүйнөлүк диндер боюнча адис Владимир Школьный “Дүйнөлүк тарыхтагы диндер” аттуу басылмасын жарыялады.

“Бул басылманы чыгарууга 8 жыл эмгектендим. Жаштар менен форумдарды жана тегерек столдорду өткөрүп, изилдөөлөрдү жүргүзгөм. Учурда жаштарга дин ишмерлери туура эмес, терс билим берип, Сириядагы согушка барууга милдеттендирип жатышат. Менин басылмамдын негизги максаты – дин боюнча туура маалымат берүү”,- деди ал.

Мындан тышкары В.Школьный басылма мектептерге жана жогорку окуу жайларга таратыларын белгиледи. “Демилге КРнын Дин маселелери боюнча комиссия тарабынан колдоо тапкан. Жакынкы арада басылманын нускасын көбөйтүп, түштүк аймактарда таратууну пландап жатабыз”,- деп түшүндүрдү ал.