Бишкек шаарында маршруттук таксилердин айдоочулары иш ташташууда

Бишкек шаарында маршруттук таксилердин айдоочулары иш ташташууда. Бул тууралуу шаар тургуну бүгүн, 28-июлда билдирди.

Анын айтымында, маршруттук таксинин жоктугунан жумушка бара албай калган. Ошондой эле ал кандайдыр бир белгисиз топ кээ бир маршруттук таксилердин айдоочуларын “айнегиңди сындырып салабыз” деп коркутуп, ичиндеги жүргүнчүлөрдү түшүрүп жатканын айтты.

Бул боюнча 130-каттамдагы маршруттук таксинин бригадири менен байланышканыбызда ал: “Бүгүн шаар боюнча көпчүлүк каттамдагы маршруттук таксилердин айдоочулары жумушка чыгышкан жок. Алар күйүүчү май кымбаттап, эмгек акталбай жатканын айтышууда. Бирок мен балдарды жумушка чыккыла дегем. Эмнегедир аларды белгисиз бирөөлөр жолдон тосуп алышып коркутуп, элдерди түшүрүп жатышыптыр”,- деди.