Бишкекте Япониянын Хиросима шаарындагы атомдук жардыруудан курман болгондорго арналган көргөзмө ачылды (фоторепортаж)

“Бул иш-чараны атомдук жардыруучу куралдарды жок кылмайынча бизге жана балдарыбызга канчалык деңгээлде коркунуч бар экенин тематикалык бурчтар аркылуу маалымат берүү максатында уюштурдук”,-деп билдиришет уюштуруучулар.

Белгилей кетсек, 6-август - Хиросимада атомдук жардыруудан каза тапкандарды эскерүү күнү. Аталган шаарда бул күнү саат 08:15те “Тынчтык коңгуроосу” кагылат. Бүткүл дүйнө эли жыл сайын курман болгондорду бир мүнөттүк эскерүү менен бирге ак көгүчкөндөрдү учурушат.

1945-жылдын 6-августунда 2 жаштагы Садако аттуу кыз атомдук жардырууда нурданууга кабылган. Анын оорусу 6-класста окуп жатканда гана билинип, кызга кандын рагы диагнозу коюлат. Бир күнү ооруканада дарыланып жатканда ага эгер кагаздан 1000 каркыра жасаса айыгары жазылган кат келет. Ошол күндөн тартып кайрадан чуркап ойногусу келген секелек кыз кичинекей каркыраларды жасай баштаган. Бирок, тилекке каршы, 9 ай оор дарт менен күрөшүп, 1955-жылы 25-октябрда Садако көз жумат. Ушундан улам 6-августта Хиросиманын мемориалдык паркына тилектеш белгиси катары кагаздан жасалган каркыралар миңдеп келип түшөт.