Орозо айт боюнча казыят буйругун аткарбай, элге туура эмес маалымат берген имам кызматынан бошотулду

Орозо айт боюнча элге туура эмес маалымат берген Ноокат районундагы Жаңы-Ноокат айылынын имамы Сагынбек Назиржан кызматынан бошотулду. Бул тууралуу бүгүн, 8-августта Кыргызстан мусулмандар дин башкармалыгынын басма сөз кызматы билдирди. 

Маалыматта “Ноокат районунун кээ бир айылдарында имамдар Орозо айт майрамы жөнүндө калкка туура эмес маалымат беришкендиктен, Орозо айт майрамы бир күнгө эрте майрамдалган. Бул иш боюнча 4-августта Жаңы-Ноокат айылында жергиликтүү калк менен имамдардын, Ош облусунун казысы Ниязалы ажы Арипов, Ноокат районунун мамлекеттик администрациясынан С.Эгембердиев, Жаңы-Ноокат айыл өкмөтүнүн башчысы Н.Юлчиев жана укук коргоо органдарынын катышуусунда жыйын болду. 

Жаңы-Ноокат айылынын имамдарынын элге туура эмес маалымат бергендери аныкталып, казыяттын буйругун аткарбагандыгы аныкталды. Жыйынтыгында Сагынбек Назиржан имамдык кызматынан бошотулду” деп айтылат.