Кыргыз Эл артисти Гүлсүн Мамашева жайлоодогу бала бакчаларда өтө турган концертке катышат

Суусамыр өрөөнүндөгү жайлоо бала бакчасына барган балдарга алдынкы маданият кызматкерлери өнөрлөрүн тартуулашат. “Роза Отунбаеванын демилгеси” коомдук фонду билдиргендей, эртең, 14-августта Роза Отунбаева Панфилов районунун Вознесеновка жана Манас районунун Үч-Коргон айылдарында болот.

Ошондой эле Чүй, Талас жана Жалал-Абад облустарындагы жайлоо бала бакчасында чийден куурчак жасоо боюнча чебер Жылдыз Бек мастер-класс көрсөтөт, КРнын Улуттук сүрөтчүлөр академиясынын сүрөтчүлөрү балдар менен сүрөт тартышат. Ал эми И.Арабаев атындагы Кыргыз мамлекеттик университетинин окутуучулары балдарга, ата-энелерге балдардын ар тараптуу өсүшү тууралуу мастер-класс өтүшөт. Кыргыз элинин улуттук оюндарынын үлгүлөрүн профессор, кыргыз элинин оюндары боюнча эксперт Таалайбек Үмүтов үйрөтсө, Абдылас Малдыбаев атындагы Кыргыз улуттук опера-балет театрынын балетмейстери Кубан Сыдыков бий искусствосу болгон менуэт, вальс, танго бийлерин тааныштырат. Мындан тышкары Салтанат Саматова жана Гүлзада Медералиева балдарга жомок окуп беришет.

Ошондой эле КРнын Эл артисти Гүлсүн Мамашева, Т.Сатылганов атындагы Кыргыз улуттук филармониясынын артисттери Мурадыл Сагыналиев, Мээрим Карыпова, Таалай Иманкулов, акын Мирлан Самыйкожо, М.Абдраев атындагы музыкалык мектеп-интернаттын окуучулары жана башкалар концерт беришет.