"Өзгөчө кырдаалдар министрлигинде бир эле тик учак бар, ал да жараксыз абалда" деди Урматбек Шамырканов

Бүгүн, 14-августта маалымат жыйынында КРнын ӨКМнын Ыкчам чара көрүү башкармалыгынын башчысынын орун басары Урматбек Шамырканов: “Өзгөчө кырдаалдар министрлигинин курамында бир эле тик учак бар, ал деле бир жылдан бери жараксыз абалда”,- деди.

Анын айтымында, аталган мекеме тик учак бөлүү тууралуу өтүнүч каты менен казак тарапка кайрылган. “Казакстан тик учак бөлүүгө даяр. Мындан тышкары өрткө каршы кызматынын техникасы жаңыланууга муктаж, бирок бюджеттик жетишпегендигинен жаңы техника сатып алуу мүмкүн эмес болууда”,- деп түшүндүрдү ал.

“Кыргызстандын 2400-2700 метрден бийик тоолуу аймактарында өрттөрдү өчүрүүдө тик учактар пайдасыз болуп калууда. 12-августтан тарта Нарын облусунун Таш-Башат айылында 80ге жакын гектар жерде кургак чөп жана бадалдар өрттөнүп кеткен. Учурда кырсык токтотулуп, бирок өрттүн очоктору дагы деле күйүүдө. Ал жакта 500гө жакын кызматкер иштеп жатат”,- деп билдирди Өрттөрдүн алдын алуу кызматынын башчысы Улан Тамабаев.