Баткендеги кыргыз-өзбек чек арасындагы атышууну тийиштүү органдар иликтөөдө

Кадамжай районундагы Өзбекстанга чектеш Халмион айыл аймагынын Орто-Ынтымак айылында болгон окуяны өзбекстандык жарандар башташкандыгын бүгүн, 19-августта Кадамжай РИИБинен билдиришти.

Алынган маалыматка ылайык, учурда бул окуя боюнча тийиштүү органдар териштирүү иштерин жүргүзүшүүдө.

Эскерте кетсек, аткезчилик товарларды өткөрүү үчүн чогулушкан Өзбек Республикасынын Алты-Арык районуна караштуу Ак-Билал айылынын 20дай тургуну чек арадан өтүп, Орто-Ынтымак айылына чейин келишкен. Чек арадан мыйзамсыз өтүүгө аракет кылгандарга кыргыз чек арачылары жакындашканда өзбек жарандары чек арачыларды таш менен урушкан. Ал эми кыргыз чек арачылары бир нече жолу эскертүү огун атышканына карабастан каршылыктарын күчөтүшкөндө кыргыз чек арачылары ок чыгарууга аргасыз болушкан. Натыйжада бир өзбек жаранына ок тийип, Кадамжай райондук ооруканасына жеткирилгенде көз жумган.