Москвада кыргыз жана тажик мигранттарын жумушка алган курулуш ишканаларына айып пул салынды

Орусиянын борбору Москвада Кыргызстан жана Тажикстандан келген мигранттарды жумушка алган курулуш ишканаларына 800 миң рублдан ашуун айып тагылды. Бул тууралуу бүгүн, 19-августта Москванын прокуратурасынын басма сөз кызматы билдирди.

Маалым болгондой, Таганск райондор аралык прокуратурасы Орусиянын миграциялык кызматы менен биргеликте “Сатори” жана “Восток транс” курулуш ишканаларында текшерүү жүргүзүп, мыйзам бузууларды аныкташты. “Аталган ишканалар Тажикстан жана Кыргызстан Республикаларынын жарандарын мыйзамсыз жумушка алышканы белгилүү болду.

Прокуратура ишканаларга карата Орусиянын Административдик укук бузуулар жөнүндөгү кодексинин “Орусия Федерациясынын аймагында чет өлкөлүк жарандарды жана жарандыгы жок адамдарды мыйзамсыз ишке алуу” беренеси боюнча кылмыш ишин козгоду. Прокурордун токтомун караштыруунун жыйынтыгында  күнөөлүүлөргө жалпысынан 880 миң рубль айып пул салынды”,- деп билдирди Москванын прокуратурасы.