Барак эксклавында жашагандарды көчүрүү үчүн 3 миллион доллар бөлүндү

Барак эксклавында жашагандарды көчүрүү үчүн 3 миллион доллар бөлүү боюнча жарлыкка КРнын Премьер-министри Жоомарт Оторбаев кол койду. Бул тууралуу 21-августта өкмөттүн басма сөз кызматы билдирди.

Акча каражаты Ош облусуна караштуу Кара-Суу районундагы Ак-Таш айыл аймагында Сары-Колот конушунун долбоорун түзүү жана курулуш инфраструктурасына сарпталат. Ал конушка Барак эксклавынын айрым тургундары көчүп келишери белгилүү болду.

Каражаттын 2 396 150 доллары аймакты өздөштүрүүгө багытталса, 603 850 доллар каражат көчүп келген тургундарга кайтарымсыз түрдө берилет. Ар бир үй-бүлөгө 200 миң сомдон ссуда бөлүнөт. Каражаттын максаттуу пайдаланышын көзөмөлгө алуу боюнча жергиликтүү бийлик органдарына тийиштүү тапшырмалар берилди.