“№47-колониянын башчысынын орун басарын бычактап салган” деп шектелген жаран СИЗОдо ур-токмокко алынганы тууралуу айтты

“№47-түзөтүү колониясынын башчысынын орун басары Милан Шакиевди бычактап салган” деп шектелип кармалгандардын бири Нуркемел Искендеров аталган фактыга эч кандай күнөөсү жоктугу жана СИЗОдо ур-токмокко алынгандыгы тууралуу айтып берди.

“2013-жылдын 26-декабрында мен “Народный” дүкөнүнүн жанында досум менен 10 мүнөткө токтоп сүйлөшүп калгам. Биздин жолугушуубуз видеокамерага тартылып калган экен. Милиция кызматкерлери ушул видеожазууларга жана М.Шакиевдин көргөзмөсүнө таянып, бизди кылмышка шектүү катары кармап алышкан. Чындыгында аны бычактап кетүү саат 17:00 чамасында орун алса, биз саат 15:00 чамасында жолукканбыз.

СИЗОдо ур-токмокко алындык. Натыйжада кыр арка сөөгүмдүн эки жеринен жана башымдан жаракат алып, учурда абалым начар”,- деди ал.

“2014-жылдын 19-августунда Н.Искендеров эч жакка чыкпоо каты менен үйүнө чыгарылган. Ал эми аны ур-токмокко алган СИЗОнун 4 кызматкери У.Сүйөркулов, С.Ботбаев, Т.Моношов жана А.Сатаровго карата “кыйноо” беренесинин негизинде кылмыш ишин козгоо боюнча арыз жазганбыз. Учурда Октябрь райондук соту тарабынан териштирүү иштери жүрүүдө”,- деди адвокат Динара Медетова.