Кыргыз аскерлеринин катышуусундагы “Тынчтык миссиясы-2014” террорчулукка каршы окуулары башталды

Кытайдын Чжужихэ аскер полигонунда террорчулукка каршы эл аралык окуулар башталды. Бул тууралуу бүгүн, 25-августта КРнын Башкы штабынын басма сөз кызматы билдирди.

Маалыматка ылайык, бул иш-чарада Шанхай Кызматташтык Уюмуна (ШКУ) мүчө мамлекеттер Казакстан, Кытай, Кыргызстан, Орусия жана Тажикстандын 7 миңдей аскери катышмакчы. Окууларга Кыргызстан тарабынан 500гө жакын аскер кызматкери барды.

КРнын Куралдуу күчтөрүнүн Башкы штабынын башчысынын орун басары Жаныбек Капаровдун айтымында, бул иш-чаранын негизги максаты - тынчтыкты сактоодо керектүү ыкмаларга ээ болуу. “Жаңы тарыхта ШКУнун мамлекеттери террорчулуктун ар кандай түрлөрү менен кезигишкен. Экстремисттер уюштурган массалык тополоңдорго да, куралдуу жоочуларга да күбө болгонбуз”,- деди ал.

Айта кетсек, “Тынчтык миссиясы-2014” аттуу окуулар 24-29-август аралыгында Кытайдын аймагында өтөт.