Министр Алиясбек Алымкуловдун аялынын жол-кайгуул кызматкерлери тарабынан кармалганы боюнча кызматтык иликтөө жүргүзүлөт

Министр Алиясбек Алымкуловдун аялынын жол-кайгуул кызматкерлери тарабынан кармалган факты боюнча кызматтык иликтөө жүргүзүлөт. Бул тууралуу Чүй ОИИББинин басма сөз кызматы бүгүн, 25-августта билдирди.

Алдын ала маалыматтарга караганда, министр Алиясбек Алымкуловдун жубайы башкарып бара жаткан унааны жол-кайгуул кызматкерлери токтотушкан. Ал жерден кандайдыр бир себептерден улам ортодо пикир келишпестик келип чыгып, министр А.Алымкулов да ага аралашкан.

22-августта эмгек жана миграция министри Алиясбек Алымкулов менен ички иштер министри Абдулда Суранчиевдин ортосунда аталган окуя боюнча кайым айтышуу орун алган болчу. Ал боюнча министр Суранчиев: “Бир апта мурун жол эрежесин бузганы үчүн МАИ кызматкерлери Алымкуловдун аялын кармашкан. Ал (ред.А.Алымкулов) мага телефон чалды. Мен Жол-кайгуул кызматынын башчысы Талантбек Исаевге чалып, кырдаалды териштирүүнү тапшырдым. Тил табыша албай калган өңдүү",- деген оюн билдирген.