"Мектептерди эң эле жөнөкөй компьютер менен камсыз кыла албасак, анда эмне иш кылып жатабыз?" деди Ош облусунун башчысы

Ош облусу боюнча 223 мугалим жетишпейт. Бул тууралуу 26-августта өткөн облустук билим берүү кызматкерлеринин август кеңешмесинде белгилүү болду.

“Облус боюнча 18 миңге жакын мугалим эмгектенет. Дагы 223 мугалим жетишпейт, бул жерде жергиликтүү бийликтин да күнөөсү бар. Негизги себеп - жаш мугалимдерге жетиштүү деңгээлде шарт түзүп бербегендик”,- деди Ош облусунун башчысы Сооронбай Жээнбеков. Ошондой эле Ош облусунда 39 мектепке компьютер жетишпегендигине да нааразычылыгын кошумчалады: “Биз жаңы мектептерди куруп, билим берүүнү алдыга жылдырабыз деп жатсак, "39 мектепке компьютер жетишпейт" деген маалымат келди. Эң эле жөнөкөй компьютер менен камсыз кыла албасак, анда эмне иш кылып жатабыз, жергиликтүү бийликтин башчылары? Мектептерди компьютер менен камсыз кылуу боюнча атайын долбоорлор, эл аралык уюмдар, демөөрчүлөр, жергиликтүү бюджет деген бар. Ушул жылдын 10-сентябрына чейин компьютер боюнча кемчиликтер жоюлсун”. Бул маселени жоюу боюнча район акимдерине жана өкүлдүн орун басарларына облус башчы тарабынан тапшырма берилди.