Алтынбек Арзымбаевди футбол ойноп, үйүнө келе жаткан маалда атышкан

Бишкек шаардык ички иштер башкы башкармалыгы Алтынбек Арзымбаевдин өлүмү боюнча толук маалымат берди.

“Кечээ, 26-август күнү саат 23:00 чамасында Октябрь райондук ички иштер башкармалыгынын нөөмөт бөлүмүнө маалымат келип түшкөн. Анда Бишкек шаарынын 8-кичи районунда жашы 30-35 чамасындагы азиат улутундагы адамдын жансыз денеси табылгандыгы тууралуу айтылган.  

Окуя болгон жерге милиция кызматкерлери барышып, аталган жаран 33 жаштагы Кара-Көл шаарынын тургуну Алтынбек Арзымбаев экендигин аныкташкан. Ал уюшкан кылмыштуу топтун мүчөсү катары Ички иштер министрлигинин каттоосунда турган.   

Окуя болгон жерден 9 миллиметр калибрлүү 6 гильза, уюлдук телефон, кара түстөгү спорт сумкасы табылган.  

Оперативдүү маалыматтарга караганда, Алтынбек Арзымбаевди футбол ойноп, үйүнө келе жаткан маалда атышкан. Ага алты ок тийген.  

Учурда “адам өлтүрүү” беренеси боюнча кылмыш иши козголуп, тергөө амалдары жүрүп жатат” деп жазылат маалыматта. 

Мындан 2 жыл мурун Алтынбек Арзымбаев "Ата Мекен" партиясынын тизмеси менен Кара-Көл шаардык кеңешинин депутаты болуп шайланган. Бир ай мурун ал кылмыш иштерине байланыштуу мандатынан ажыратылган болчу. 

Айта кетсек, март айында дагы Алтынбек Арзымбаевге кол салуу болгону айтылган эле. Анда белгисиз 3 адам ага карата ок чыгарышкан, бирок Алтынбек Арзымбаев качып кетүүгө үлгүргөн.