Депутаттар Маданият министрлиги 2 жылдан бери жарытылуу иш жасабаганын айтышты

Парламенттин Билим берүү, илим, маданият жана спорт боюнча комитетинин 2-cентябрдагы жыйынында эл өкүлдөрү Маданият, маалымат жана туризм министрлигинин ишин сынга алышты. Комитет төрагасы Каныбек Осмоналиев эки жылдан бери министрлик бир да алгылыктуу иш жасабаганын айтты. Министрликтин статс-катчысы депутаттын сынын укту.

“Маданият министрлиги мыйзам ишин толугу менен таштап салды. Келип эски текстти минтип окуп коюу - уят иш. Депутат Карганбек Самаков жасаган ишти министрлик жасай элек. Мыйзам долбоорлорун түзүү боюнча канчалаган сунуштар болуп жатат, бирок министрлик бир да иш жасабаптыр. Жөн гана карап, былтыркы мыйзамыңарды көтөрүп келесиңер. 70 миллион сом бөлүп “Курманжан датка” фильминин тартылганы министрликтин эрдиги эмес. Ким жүгүрүп, ким аракет кылып тартканын биз билебиз”,- деди Осмоналиев.