Кубанычбек Кулматов Самсун жана Трабзон шаарларынын мэрлери менен жолугушту

Бишкек шаарында 2-сентябрдан 7-сентябрга чейин Түрк дүйнөсүнүн инженерия, архитектура жана шаар куруу боюнча VI курултайы өтүүдө. Иш-чаранын алкагында борбор калаанын мэри Кубанычбек Кулматов Самсун жана Трабзон шаарларынын мэрлери Юсуф Зия Йылмаз, Орхан Февзи Гумрукчуоглу менен жолугушту. Бул тууралуу 4-сентябрда мэриянын басма сөз кызматы маалымдады.

Жолугушууда тараптар шаардын айланасын тазалоо, шаар куруу, экономика, социалдык тармак жана транспорт жаатындагы көйгөйлөрдү талкууга алышты.

Кубанычбек Кулматов: "Биздин өлкөдө өтүп жаткан VI курултай Бишкек шаарынын инфраструктурасын жакшыртууга шарт түзөт. Ошондой эле курултайдын катышуучулары тажрыйбалары менен бөлүшүшөт",- деп билдирди.

Трабзон шаарынын мэри Орхан Февзи Гумрукчуоглу өткөн жылы Бишкек делегациясынын Түркияга болгон расмий иш сапарында кызматташуу жөнүндө протоколго кол коюлганын айтты.