Ырчы жана актриса Асема Токтобекова Казакстандын сахнасын багынтууга бел байлайт

Ырчы жана актриса Асема Токтобекова Казакстандын сахнасын багынтууга бел байлаганы турат. Бул кабары менен Асема SUPER.KG порталына бүгүн, 8-сентябрда бөлүштү.

- Асема айым, коңшу Казакстан мамлекетинин сахнасын багындырууга белсенип жатыптырсыз, ошол тууралуу айта кетсеңиз.

- Мен ойлобогон жерден Казакстанга кетүүгө дарданып жатам. Бул башка бирөөнүн кыялы болсо, мен үчүн оор тандоо болууда. Белгилүү ырчылар Юлдуз Усманова, Шахзода, Пилигрим, “Алдавай” тобу жана башкалар менен иштешип келген Максуда Айтикеева, шоу чөйрөдө Малика аттуу ысымы менен таанылган айым мага иштешүү боюнча сунуш киргизди. Биз экөөбүз тойдон таанышканбыз. Ага жаныбызда отургандар менин ырчы жана актриса экенимди айтышыптыр. Ал кайсы киного тартылгамды сурады. "Боз салкын", бирок аны көргөн эмес болушуңуз керек" десем, фильм казактарга көрсөтүлгөндүктөн, билет экен. "Сен тасмадан башкача экенсиң, тааныган жокмун" деди. Малика эже иштешүү боюнча сунуш киргизгенде, бул жөн гана сөз болуш керек деп калгам. Ал Казакстандан таңкы саат 5те чалып, мени казак ырчылары менен гастролдоо үчүн кербен автобуска кошуп жатканын айтты. Мен ал учурда "Көк жал" аттуу тасмамды монтаждоо менен алпурушуп жүргөнүмө байланыштуу бул сунушун четке каккам.

- Таптакыр башка ысым менен чыгат экенсиз, сыр болбосо, кандай ысым? 

- Азырынча айтпай турайын. Бир гана ысымым эмес, имиджим да түп-тамырынан өзгөрөт. Келбетиме көп сын айтты. Чачымды өстүрүшүм керек экенин, калганын өзү колго аларын айтты. Бул иштешүү бир четинен мени кубандырса, башка ысымды алып, элимди таштап кетип жатканыма жаман болуп жатам. Малика эже "бирөөнү ойлосоң өмүр бою өзүңдү курмандыкка чабасың, биринчи өзүңдүн перспективаңды ойлошуң керек" деген кеңешин айтты. 

- Канча мөөнөткө кетүү пландалууда?

- Келишим 4-5 жыл болуп калышы мүмкүн. Негизи, картайганча кетем го.

- Үй-бүлөңүз сиздин жаныңызда болобу?

- Казакстан жакын болгондуктан, үй-бүлөм бул жакта эле калат. Алар менен чогуу кетип жүдөбөй, келип-кетип турам. Бирок айтканга оңой болгону менен, кыйын болуп турат. Байкаштырып көрөйүнчү.

- Сиз үчүн карьера биринчи орундабы?

- Эгер карьера мен үчүн биринчи орунда болсо, турмушка чыгып наристе төрөбөйт элем. Мен аялзатына тийиштүү милдетти аткарып, жеке жашоомду өз нугуна салып алдым. Азыр чыгармачылыкты колго алуу убагы келди. 

- Маегиңизге рахмат, ийгиликтер коштоп жүрсүн.

Белгилей кетсек, Бишкекте 18-сентябрда Асема Токтобекова режиссёрлук кылган криминалдык драма жанрындагы “Көк жал” аттуу тасманын бет ачары болот.