Ошто "медициналык факультетке өткөрүүнү убада кылып абитуриенттерден 300 миң сомго чейин акча алган" деген шек менен 6-курстун студенти кармалды

"Жогорку окуу жайына өткөрүүнү убада кылып, абитуриенттерден акча алган" деген шек менен ОшМУнун медициналык факультетинин студенти кармалды. Бул тууралуу 9-сентябрда ИИМдин Ош шаары жана Ош облусу боюнча башкармалыгынын басма сөз кызматы билдирди.

Маалыматка караганда укук коргоо органдарына шаардын үч тургуну арыз менен кайрылган. Алар Ош мамлекеттик университетинин медициналык факультетинин 6-курсунун студенти Саматов Курманбек окууга өткөрүүнү убада кылып, эки кыздан 150 миң сомдон, бир кыздан 120 миң сом алганын айтышкан. Бирок абитуриенттердин окууга өтпөй калганы белгилүү болгон. 

Тергөө амалдарынын жүрүшүндө кылмышка шектүү эки жыл мурун өзүнүн айылдашы, 1996-жылы Ноокат районунда туулган С.Г. аттуу кыздан 3 миң доллар алганы аныкталган. Эки жыл аралыгында "окуп жатасың" деп алдап, баа коюлган жасалма зачёттук китепчени көрсөтүп келгени такталган. Укук коргоо органдары өзүн 2-курстун студенти деп эсептеген кыз Саматов Курманбекке ишенип окууга келбей жүргөнүн аныкташкан. 

Жогорудагы фактылар боюнча иликтөө иштери жүрүп, шектүү тергөө абагына отургузулду. 

"Бүгүн, 9-сентябрда милицияга жабыр тарткан дагы үч жаран кайрылды. Эки кыздын ата-энеси аталган факультетке кыздарын өткөрүү үчүн К.Саматовго 140 миң сом жана 300 миң сом берип, алданып калышканын айтышкан. Дагы бири төрт абитуриенттин атынан ортомчу болуп 12 миң доллар (ар бири үчүн 3 миң доллардан) бергенин билдирди" деп айтылат маалыматта.