Дин иштери боюнча мамлекеттик комиссиянын мурдагы жетекчиси Абдилатиф Жумабаевдин 80 миң долларлык уурдалган унаасы табылды

Ички иштер министрлигинин басма сөз кызматынын бүгүн, 10-сентябрдагы берген маалыматына караганда, үстүбүздөгү жылдын 17-августунда Исанов жана Москва көчөлөрүнүн кесилишинде 80 миң долларлык Лексус LX 570 унаасынын уурдалганы боюнча милиция кызматкерлерине маалымат келип түшкөн.  Бул боюнча кылмыш иши козголуп, иликтөө иштери жүргөн. Анын жыйынтыгында 2-сентябрь күнү кылмышка шектүүлөрдүн бири 1991-жылы туулган Бишкек шаарынын тургуну кармалган. Ошол эле күнү уурдалган унаа Бишкек шаарындагы турак үйлөрдүн биринен табылган.

Учурда кармалган жаран убактылуу кармоочу жайга киргизилип, башка кылмышка шектүүлөрдү кармоо иштери жүрүп жатат.

Ал эми айрым маалымат булактары унаа Дин иштери боюнча мамлекеттик комиссиянын мурдагы жетекчиси, учурда Кыргызстандын Сауд Арабиядагы элчиси Абдилатиф Жумабаевге тиешелүү экендигин жазып чыгышты.