Кыргызстан аркылуу Палестина, Сирияга барууну максат кылган тажик жараны: "Мусулман бир туугандар кыйналышты, аларга жардам берем"

Бүгүн, 11-сентябрда Ош шаардык ИИБинин кызматкерлери тарабынан Түркияга учуп кетүүгө камынып жаткан тажикстандык жаран кармалды. Ыкчам маалыматтарга караганда, кармалган жаран Кыргызстанга келип, кийин Түркия аркылуу Палестинага, Сирияга согушуу үчүн барууну максат кылган. Өз сөзүндө кармалган Комил Рахматов: “Палестиналык мусулман туугандар аябагандай кыйналышты, аларга жардам берем, акырына чейин барам”,- деп билдирген. Буга катар эле ал Палестинага баруу үчүн өзүнүн уюн сатып келгендигин, ок атуучу куралды барган өлкөдөн таап аларын айткан.

Комил Рахматов буга чейин коңшусун сабап койгондугу үчүн соттолгондугу белгилүү болгон. Учурда укук коргоо кызматкерлери аталган жаран боюнча иликтөө иштерин жүргүзүп жатышат.