Дүйнөлүк көчмөндөр оюндары: Көк бөрү боюнча финалдык беттеш кыргызстандык командалардын ортосунда болот

Чолпон-Ата шаарындагы Бүткүл дүйнөлүк көчмөндөр оюндарынын алкагында бүгүн, 12-сентябрда тайпадагы акыркы оюндар өтөт. Анда Кыргызстан-2 командасы менен Түркия, Алтай (Орусия) менен Кыргызстан-1 командалары беттешет. Андан тышкары Өзбекстан менен Ооганстан өз ара беттешсе, монголиялыктар Тажикстанга каршы турушат. Мелдештин жобосуна ылайык, 8 команда катышып жаткан мелдеште 2 тайпада күрөш жүрүүдө. Топтогон упайлардын негизинде тайпадан биринчи болуп чыккан эки команда финалда кез келет. Ал эми тайпада 2-орунду ээлеген командалар өз ара 3-орунду талашышат. Финалдык оюндар 14-сентябрда өтөт. Азырынча эки тайпада тең кыргызстандык командалар эч бир команданы алдыга салбай келүүдө. Демек, алтын менен күмүштү Кыргызстандын башкы курамы менен экинчи курам талашат.