Жумгал районундагы өрттүн келип чыгуу себеби аныктала элек

Жумгал районундагы өрттүн келип чыгуу себеби аныктала элек. Бул тууралуу Өзгөчө кырдаалдар министрлигинин өкүлү Нурлан Ташманбетов бүгүн, 16-сентябрда билдирди.

“Өрттүн келип чыгуусуна ошол жактагы малчылар же аңчылар себепкер болушу мүмкүн. Бирок азырынча себеби аныктала элек”,- деди Нурлан Ташманбетов.

Анын айтымында, өрттү өчүрүү иштери дале уланып жатат. Өрттүн токтобой жатышына кургакчылык жана шамал себеп болууда.

Айта кетсек, үстүбүздөгү жылдын 10-сентябрында Жумгал районунун Каныш капчыгайында өрт чыккан. 12-сентябрга алынган маалыматтарга караганда, тилсиз жоонун кесепетинен 600 гектарга жакын куураган чөп жана бадалдар күйгөн. Ошондой эле 11-сентябрь күнү өрттү өчүрүү учурунда өрт өчүрүүчү Алтынбек Дүйшөналиев жана Жумгал райондук мамлекеттик каттоо кызматынын кызматкери Абаскан Нуралиев каза болгон.