Жеке ишкерди сабап, коркутуп, ири суммадагы акча каражатын алган уюшкан кылмыштуу топтун мүчөлөрү кармалды

Кыргызстанда жеке ишкерди коркутуп, ири суммадагы акча алган кылмыштуу топтун мүчөлөрү колго түшүрүлдү. Бул тууралуу ИИМдин басма сөз кызматы кабарлайт.

Маалыматка ылайык, август айынын ортосунда Бишкекте Бөкөнбаев жана Тыныстанов көчөлөрүнүн кесилишинде эки белгисиз жаран жалгыз бараткан жеке ишкерди Ауди үлгүсүндөгү унаага кыйноо менен салып кеткен. Аны шаар сыртына алып чыгып сабап, коркутуп, 470 миң сомго жакын акча каражатын тартып алышкан. Натыйжада жабырлануучу оор жаракат алып, ооруканага жеткирилген.

Бул кылмышка шектелип 1977-жылы туулган К.М. аттуу Чүй облусунун тургуну кармалды. Анын уюшкан кылмыштуу топтордун биринин активдүү мүчөсү экени жана буга чейин соттолгону маалым болду. Анын жанында 1979-жылы туулган М.К. аттуу жаран болгон. Учурда иликтөө иштери жүрүп жатат.