Нариман Түлеевдин сотунда Эсеп палатасынын аудитору катачылык кетирип алганын мойнуна алды

Нариман Түлеевдин кечээ, 24-сентябрда Бишкек шаардык сотунда өтүп жаткан сот отурумунда Эсеп палатасынын аудитору Казакбай Мамырканов катачылык кетирип алганын мойнуна алды. Эсеп палатасынын аудитору Н.Түлеевдин учурунда келген автобустар боюнча аудит жүргүзүүдө “Кыргыз темир жолу” жана Бишкек мэриясы алып келген автобустарды салыштырып көрүп, “Кыргыз темир жолу” ишканасы пайдалуу баа менен алынып келингендиги жөнүндө расмий токтом жазган. Казакбай Мамырканов ошол кезде УКМК “Кыргыз темир жолу” ишканасы алган автобустар менен мэриянын алган автобустарынын сүрөтүн гана алып келишкендигин, ошондуктан сүрөттөрдөн карап эле жыйынтык чыгарып, эки автобус бирдей деген чечимге келгендигин билдирди. Нариман Түлеев өз кезегинде аудиторго автобустардын сүрөттөрүн көргөзүп: “Карасаңыз, бул жерде “Кыргыз темир жолу” алган автобустар мэрия алган автобустардан кыйла эле кичинекей, бир эле эшиктүү болуп турат. Биз алып келген автобус менен булардын автобустарынын техникалык мүнөздөмөлөрү да эки башка”,- деп билдирди. Мындан соң Казакбай Мамырканов катачылык кетирип алганын мойнуна алды.