Инчхон-2014: Футбол боюнча Кыргызстан курамасы Иорданияга 2:0 эсебинде утулуп, мелдештен чыгып калды

“Инчхон-2014” Жайкы Азия оюндарынын алкагында футбол боюнча Кыргызстандын олимпиадалык курама командасы жарым чейрек финалдык оюнда Иордания курамасы менен беттешти.

Беттештин негизги убактысы 0:0 эсебинде аяктады. Негизги убакытта кыргызстандыктар коргонууга ыктап, каршы чабуул уюштуруп жатты. Биздин футболчулардан ылдамдыгы жана чеберчилиги жагынан анча көп айырмаланбаган иорданиялыктар топту көзөмөлдөштү. Стандарттык абалдарда Кыргызстан гол жаратууга мүмкүнчүлүк тапканы менен, гол жаратуу мүмкүн болгон жок. Оюндун негизги убактысы аяктаган соң эреже боюнча командалар 15 мүнөттүктөн эки тайм ойномой болушту. Биринчи 15 мүнөттүктө эки команда тең канча аракет кылбасын, эсеп 0:0 эсебинде жыйынтыкталды. Ал эми экинчи 15 мүнөттүк иорданиялыктарга жеңиш, аны менен катар чейрек финалдык жолдомо алып келди. Кыргызстандыктар коргонууда ката кетирип, каршылаштарга бурчтан чыгарып берүүдө бир гол жаратуу мүмкүнчүлүгүн түзүп коюшту. Бир гол жараткан соң Иорданиянын оюнчулары коргонууга ыктап, каршы чабуулдун аракетин көрүп жатышты. Экинчи голду алар каршы чабуулда киргизип, эсеп айырмачылыгын 2 голго жеткиришти.